Námskeiðslýsing:

Í námskeiðinu fá nemendur yfirsýn um núverandi fyrirkomulag og þróun í íslenskum sjávarútvegi.

Helstu viðfangsefni: Ágrip af sögu íslensks sjávarútvegs. Vistkerfið og helstu sjávardýr í hafinu umhverfis Ísland. Hagtölur íslensks sjávarútvegs og umfjöllun um stærstu sjávarútvegsfyrirtækin. Fyrirkomulag og uppbygging skipa og veiðarfæri sem notuð eru á Íslandsmiðum. Yfirlit um helstu aðferðir við stjórnun fiskveiða með áherslu á íslenska aflamarkskerfið (kvótakerfið) og þróun þess. Afurðir, vinnsluleiðir og þróun markaða fyrir sjávarafurðir í gegnum tíðina. Starfsumhverfi, fjárhagsstaða og afkoma fyrirtækja í sjávarútvegi. Virðiskeðja sjávarútvegs og hugtökin „fullnýting afurða“ og „hámörkun verðmæta í stað magns“. Verklegur hluti námskeiðsins inniheldur heimsókn í fiskiðjuver og skip, ásamt æfingu í flökun og framleiðslu helstu afurða af botnfiskflaki. Hluti fyrirlestra gæti verið fluttur á ensku.

Resultados del aprendizaje

Að námskeiðinu loknu á nemandinn að geta:

Nefnt helstu þætti sem hafa haft áhrif á sögu fiskveiða og vinnslu við Ísland
Lýst fiskiskipum, uppbyggingu og búnaði þeirra ásamt helstu veiðarfærum á Íslandsmiðum
Borið saman og rætt á gagnrýninn hátt mismunandi fiskveiðistjórnunaraðferðir með sérstakri áherslu á íslenska aflamarkskerfið
Fjallað um magn og verðmæti helstu afurða og vinnsluaðferðir í íslenskri fiskvinnslu
Skýrt mikilvægustu markaði fyrir sjávarafurðir íslendinga og þróun þeirra
Útskýrt meginþætti í rekstri íslenskra sjávarútvegsfyrirtækja og mikilvægi sjávarútvegs fyrir íslenskt hagkerfi.
Aflað gagna um sjávarútveg, unnið með þau í töflureikni og skilað sem heilstæðu verkefni.
Greint og útbúið helstu afurðir af botnfiski
Fjallað um virðiskeðju íslensks sjávarútvegs með áherslu á síðustu þrjá áratugi
Tengt stjórnkerfi fiskveiða við fullnýtingu afurða og hámörkun verðmæta.